Қазақстан Президенті мен Бельгия Премьер-министрі кездесті
Қазақстан Президенті Қасым-Жомарт Тоқаев Бельгия Премьер-министрі Барт де Вевермен кездесіп, саяси диалог пен сауда-экономикалық байланыстарды нығайтуды талқылады.
Мемлекет басшысы Қасым-Жомарт Тоқаев Бельгия Премьер-министрі Барт де Вевермен кездесу өткізді. Тараптар екіжақты ынтымақтастықтың қазіргі жай-күйі мен даму перспективаларын талқылады, саяси диалогты нығайтуға және сауда-экономикалық, инвестициялық байланыстарды кеңейтуге ерекше назар аударды, деп хабарлайды Qazaqtoday.info сайты.
Қасым-Жомарт Тоқаев Бельгияны Қазақстанның Еуропалық Одақтағы басты серіктестерінің бірі деп атады. Президенттің айтуынша, экономикалық ықпалдастықтың қарқыны зор әлеуетке ие. Бельгия Қазақстан экономикасына қаржы салған 10 жетекші инвестордың қатарына кіреді. Соңғы 20 жылда Бельгиядан тартылған тікелей инвестиция көлемі 15 миллиард долларды құрады.
Өзара сауда айналымы да тұрақты өсіп келеді. Өткен жылы оның көлемі 580 миллион доллардан асты. Қазақстанда Бельгия капиталы қатысқан 110-нан астам компания жұмыс істейді. «Бұл өзара тиімді ынтымақтастықты нығайтуға деген ортақ ұмтылысымызды көрсетеді. Танымал бельгиялық компаниялар біздің нарыққа белсенді түрде келуде», — деді Қасым-Жомарт Тоқаев.
