Назым Қызайбай мен Виктория Графеева Әлем кубогының чемпионы атанды

Фото: ҰОК

Қазақстан әйелдер құрамасы Қытайдың Гуйань қаласында өткен World Boxing аясындағы Әлем кубогында екі алтын медаль жеңіп алды, деп хабарлайды Qazaqtoday.info сайты.

Турнирдің финалында Назым Қызайбай мен Виктория Графеева қарсыластарын жеңіп, чемпион атанды.

54 келіге дейінгі салмақ дәрежесінде өнер көрсеткен үш дүркін әлем чемпионы Назым Қызайбай Италия өкілі Сирин Шаарабимен қолғап түйістіріп, төрешілердің шешімімен 4:1 есебімен жеңіске жетті. Осылайша қазақстандық боксшы Әлем кубогының алтын жүлдесін иеленді.

Ал 60 келіге дейінгі салмақта Виктория Графеева Тайвань өкілі, Олимпиада чемпионы Линь Юйтинмен кездесті. Тартысты өткен жекпе-жекте Графеева 3:2 есебімен басым түсті. Алғашқы раундта есе жібергенімен, үшінші раундта қарсыласын нокдаунға жіберіп, кездесудің тағдырын өз пайдасына шешті.

Нәтижесінде Қазақстан құрамасының қоржыны тағы екі алтын медальмен толықты. Назым Қызайбай өз мансабындағы кезекті халықаралық титулын жеңіп алса, Азия чемпионы Виктория Графеева Олимпиада чемпионын жеңіп, Әлем кубогының жеңімпазы атанды.