Астанада ерекше қажеттілігі бар оқушыны құрдастары аяусыз соққыға жықты
Астана мектептерінің бірінде ерекше қажеттілігі бар жасөспірімді құрдастары соққыға жықты. Полиция шабуылдаушының ата-анасын жауапқа тартты.
Астанада ерекше білім беруді қажет ететін жасөспірімді құрдастары топ болып соққыға жықты. Қайғылы оқиға туралы жәбірленушінің анасы әлеуметтік желіде жазды, деп хабарлайды Qazaqtoday.info сайты.
Анасының айтуынша, оның ұлы сабақтан шыққан кезде оған артынан шабуыл жасалған. «Оны қылғындырып, 15-тен астам соққы жасады. Басқалары айналада тұрып, ешкімнің араша түсуіне мүмкіндік бермеген. Менің ұлымның психикалық-сөйлеу дамуы тежелген, ол өзіне не үшін мұндай қастандық жасалғанын түсінген де жоқ. Айналадағы балалар бұл көріністі күліп, телефонға түсіріп тұрды», – дейді жәбірленушінің анасы.
Оқиғаға қатысты Есіл ауданының полициясы түсініктеме берді. Ведомство мәліметінше, шабуыл жасаған жасөспірімнің заңды өкілі баланы тәрбиелеу жөніндегі міндеттерін орындамағаны үшін әкімшілік жауапкершілікке тартылған.
Сондай-ақ полиция қызметкерлері мектеп әкімшілігімен және ата-аналармен бірлесіп, болашақта мұндай оқиғаларға жол бермеу және оқушылардың тәртібін бақылауды күшейту мақсатында құқық бұзушылықтың алдын алу бойынша кеңес өткізгені хабарланды.
