Гүлзира Айдарбекова халыққа қайғылы хабар жеткізді

Сурет: kznews.kz

Танымал продюсер Гүлзира Айдарбекова кәсіпкер әрі блогер Сәуле Базарханның қазасына байланысты әлеуметтік желідегі парақшасында көңіл айтты. Продюсер марқұммен өте жақын араласқанын, оны туған сіңлісіндей көргенін жеткізді, деп хабарлайды Qazaqtoday.info сайты.

Өнер иесінің айтуынша, ол қайғылы хабарды Шымкент қаласына ұшып келгенде естіген. Продюсер Сәуле Базарханмен бірге Ташкенттегі концерттен кейін демалуды жоспарлап, сапарды алдын ала ұйымдастырған екен. Суық хабарды естіген соң, ол жоспарын кейінге қалдырып, марқұммен қоштасу үшін дереу кері қайтқан.

Гүлзира Айдарбекова Сәуле Базарханды жер қойнына тапсырмай тұрып, соңғы рет көріп қалуды қалағанын жазды. «Үйіне бардым, кірдім көрдім, моп-момақан болып ұйықтап жатыр, өзі де өте сабырлы еді», – деп сипаттады ол марқұмды. Сол күні кешке марқұмның бауырлары мен жақын құрбылары жиналып, оны еске алған.

Келесі күні Ташкентте өтетін концертіне байланысты продюсер амалсыз кері ұшуға мәжбүр болғанын жеткізді. Алайда ол балалары Жұлдыз, Заңғар және Индираға жаназа мен құран оқыту рәсіміне қатысуды тапсырған. Айдарбекованың жазуынша, қоштасуға келгендердің барлығы марқұмды қимастықпен еске алып, көз жасын тыя алмаған.