Ақмола облысы Қорғалжын ауданындағы Сабынды ауылынан екі шақырым жерде орналасқан бөгет жарылды. Қазіргі уақытта 200-ден астам адам мен 50-ден астам техника жұмылдырылып, судың бетін қайтару жұмыстары жүргізіліп жатыр, деп хабарлайды Qazaqtoday ақпарат агенттігі.
Облыс әкімдігінің хабарлауынша, оқиға орнына жедел штаб құрылып, тиісті шаралар қабылдануда. Апаттың салдарын жоюға 230-дан астам адам, оның ішінде құтқарушылар мен жергілікті тұрғындар, сондай-ақ 56 бірлік арнайы техника тартылған.
«Сабынды ауылына су басу қаупі жоқ. Жарылған бөгеттің жағасын нығайту және су ағынын басқа арнаға бұру жұмыстары жүріп жатыр. Сондай-ақ Астана – Қорғалжын тасжолы штаттық режимде жұмыс істеп тұр, жолға су жайылған жоқ», — деп хабарлады әкімдік.
Жергілікті билік жағдай толық бақылауда екенін жеткізді. Судың деңгейі бақыланып, қауіпсіздік шаралары күшейтілді.
Фото: Әлеуметтік желіден
