Петропавл мектебінде дабыл: Оқушыдан тапанша табылып, ата-анасы да жазаланды
Петропавлда 11-сынып оқушысы мектепке пневматикалық тапанша әкелген. Оқиғадан соң оқушы мен оның ата-анасы жауапкершілікке тартылды.
Петропавлдағы мектептердің бірінде 11-сынып оқушысынан қару табылды. Алдын ала мәлімет бойынша, жасөспірім тапаншаны төменгі сыныптағы балаларға көрсетіп, тіпті бір рет оқ атқан болуы мүмкін, деп хабарлайды Qazaqtoday ақпарат агенттігі.
Бұл деректі облыстық білім басқармасы мен полиция департаменті растады. Мектепке алғашқы хабарды басқа оқушылардың ата-аналары жеткізген. Оқиғадан соң мектеп әкімшілігі дереу күзет қызметін шақырып, оқушыны кабинетке кіргізген. Бұл туралы оның ата-анасы мен ювеналды полиция инспекторына хабар берілген.
Тексеру кезінде оқушыдан табылған қарудың пневматикалық тапанша екені анықталды. Ол оқ ататын қаруға жатпайды. Оқиға салдарынан ешкім зардап шеккен жоқ.
Тексеріс қорытындысы бойынша оқушы ұсақ бұзақылық жасағаны үшін әкімшілік жауапкершілікке тартылды. Ал оның ата-анасына баланы тиісінше тәрбиелемегені және бақылаусыз қалдырғаны үшін шара қолданылды.
