Кентаудағы жарылыстан бір қыз қайтыс болды: Жақындары газдың иісін айтқан

Түркістан облысы Кентау қаласындағы қымызханада Жаңа жыл түні болған жарылыстан 18 жастағы бойжеткен көз жұмды. Қайғылы оқиғада денесін күйік шалған тағы төрт адам ауруханаға түсті. Зардап шеккендердің екеуі жансақтау бөлімінде емделіп жатыр, деп хабарлайды Qazaqtoday ақпарат агенттігі.

Қаза тапқан Дана Сағынғалиқызы бұл мекемеде небәрі бір ай бұрын жұмысқа тұрған. Ол колледждің 2-курс студенті болған. Жақындары Жаңа жыл кешінде Дананы жұмысы аяқталған соң алып кетпек болғанын айтады. Алайда жұмыс қарқынды жүріп жатқанын сылтауратып, басшылық оны жібере қоймаған.

Оқиға алдындағы сәтте анасы мен сіңлісі қымызханадан газ иісі шығып тұрғанын аңғарып, ескерткен. Бұл жайлы бірнеше адам айтып, қауіп туралы алдын ала ескерту болған.

«Қауіптің барын айтқанымызбен, ешкім тыңдамады. Енді қызыымыздан айырылып қалдық. Кінәлілер жауапқа тартылсын,» – дейді марқұмның жақындары.

Кентау әкімдігі жарылысқа байланысты іс қозғалғанын және оқиғаның себептері толық анықталып жатқанын хабарлады. Сондай-ақ, жарылыстан зақым келген үйлерді қалпына келтіру жұмыстары жүргізілетіні айтылды.

Фото: Әлеуметтік желіден