Фото: видеодан скрин
Шығыс Қазақстан облысында полиция қызметкерлері тыйым салынған интернет-дүкенге қатысы бар тағы бір күдіктіні анықтады. 2006 жылы Алматы облысында туған азаматша есірткі саудасымен айналысатын онлайн желіде «қойма-ораушы» ретінде жұмыс істеп жүргені белгілі болды, деп хабарлайды Qazaq Today ақпарат порталы.
Күдікті жалдап тұрған пәтерде санкцияланған тінту жүргізу барысында ақ түсті ұнтаққа ұқсас зат салынған бес полимерлі қаптама және өсімдік тектес заты бар екі пакет табылып, тәркіленді. Сараптама нәтижесінде алынған психотроптық заттардың жалпы салмағы 495,32 грамм екені анықталды.
Тергеу мәліметінше, ұсталған азаматша мессенджер арқылы есірткі таратумен айналысатын жұмысқа орналасып, белгісіз куратормен байланыста болған. Ол куратордан түрлі тапсырмалар алып отырған.
Аталған дерек бойынша сотқа дейінгі тергеп-тексеру басталды. Күдікті уақытша ұстау изоляторына қамалды.
ШҚО полиция департаменті интернет арқылы жастарды есірткі бизнесіне тарту фактілерінің жиілеп бара жатқанын ескертіп, мұндай «жеңіл табыс» қылмыстық жауапкершілікке әкелетінін атап өтті. Құқық қорғау органдары жастарды сақ болуға және күмәнді ұсыныстардан бас тартуға шақырады.
