Мобильді аударымдарға өзгерістер енгізілді
Фото: fingramota.kz
Қазақстанда 2026 жылдың 1 қаңтарынан бастап мобильді ақша аударымдарын бақылауға қатысты талаптар күшейтіледі, деп хабарлайды Qazaq Today ақпарат порталы.
Бұған дейін тек бір ғана өлшем қолданылған. Атап айтқанда, егер бір адамға үш ай қатарынан әртүрлі адамдардан 100 және одан да көп аударым келіп түссе, бұл кәсіпкерлік қызметтің белгісі ретінде қарастырылатын.
Енді бұл талапқа қосымша шарт енгізіледі. Соңғы үш айдағы жалпы қаржы түсімі 12 ең төменгі жалақыдан, яғни 1 020 000 теңгеден асқан жағдайда мұндай операциялар бақылауға алынады.
Демек, жеке шотқа (кәсіпкерлік мақсатта ашылмаған) үш ай бойы кемінде 100 түрлі адамнан ақша түсіп, оның жиынтық сомасы белгіленген межеден асып кетсе, бұл кірістер кәсіпкерлік табыс ретінде бағаланады.
