Бахрейндегі Азия чемпионатында қазақ фехтованиешілері екі қола медаль алды
Бахрейндегі жастар арасындағы Азия чемпионатында қазақстандық рапирашы қыздар мен сабляшылар қола медаль жеңіп алды. Құрама қоржынында жеті медаль бар.
Фото: Турар Казангапов / НОК РК
Бахрейнде өтіп жатқан фехтованиеден жастар (23 жасқа дейінгі) арасындағы Азия чемпионатының командалық турнирлерінің бірінші күні қазақстандық рапирашы қыздар мен сабляшылар қола медаль жеңіп алды.
Бұл туралы Qazaqtoday.info сайты хабарлайды.
София Актаева, Алена Гноева және Алина Искандерова плей-оффтың бірінші раундында үндістандық рапирашы қыздарды сенімді түрде жеңді – 45:28. Жартылай финалда Гонконг құрамасымен соңғы екі сайысқа дейін біздің қыздар 35:33 есебімен алда болды. Алайда өкінішке орай, 43:45 есебімен жеңіліс тапты.
Қазақстандық сабляшылар Қуаныш Ерғашбай, Қайназар Нұрқатулы, Бексұлтан Абжал және Ерхан Қараман командалық жарыстардың басында Макао құрамасын 45:24 есебімен жеңді. Бұл жерде де жартылай финал біздің фехтованиешілер үшін кедергі болды. Сауд Арабиясына 15:20 есебімен ұтылып жатқан қазақстандықтар қарсыластарын қуып жетуге күш тапты. Финалға дейінгі екі сайыс қалғанда алға шықты – 35:32. Алайда соңы өкінішке орай саудтықтардың пайдасына шешілді – 45:42.
Осылайша, сабляшылар мен рапирашы қыздар Қазақстан қоржынына тағы екі қола медаль салды. Жалпы алғанда, Манамадағы құрамамыздың еншісінде жеті медаль бар: Кирилл Проходовтың алтыны, Қайшы Жаныбек пен Мария Лесовскаяның күмістері, сондай-ақ төрт қола.
Бахрейн астанасы Манамадағы жастар арасындағы континенттік біріншілік 2 қарашаға дейін жалғасады. Қазақстандық спортшылар қарудың барлық түрінен өнер көрсетеді.
