Amanvibe.kz басылымының мәліметінше, ФИФА-ның Дауларды шешу палатасы клубқа ойыншы алдындағы жалақы берешегін өтеуді және келісімшарт талаптарын бұзғаны үшін өтемақы төлеуді міндеттеген.
Шешімге сәйкес, «Атырау» Гилберт Кумсонға жалақы бойынша 5,5 миллион теңге берешегін және келісімшарт талаптарын бұзғаны үшін 13,75 миллион теңге өтемақы төлеуі тиіс. Осылайша, жалпы төлем көлемі 19,25 миллион теңгені құрайды. Бұдан бөлек, берешек сомасына жылдық 5 пайыз мөлшерінде өсімпұл есептеледі.
Дереккөз мәліметіне сүйенсек, футболшыға «Атырау» клубы оның Қазақстанда өнер көрсетуі үшін қажетті визаны рәсімдеп, жұмыс істеуге рұқсат алуға көмектеспеген. Сондай-ақ ойыншының ресми матчтарға қатысуына қажетті жағдай жасалмаған.
Осыған байланысты Гилберт Кумсон келісімшартты бұзып, ФИФА-ға шағым түсірген. Нәтижесінде халықаралық футбол ұйымы ойыншының пайдасына шешім шығарды.
Айта кетейік, ганалық шабуылшы «Атырау» сапында бірде-бір ресми матчқа қатыспаған. Соған қарамастан, клуб енді оған 19 миллион теңгеден астам қаражат төлеуге міндетті. Бұған дейін «Астана» футболшылары да жалақы бойынша берешекті өтеуді талап етіп, мәселе шешілмеген жағдайда қатаң шараларға баруға дайын екенін мәлімдеген болатын. Кейін елордалық клуб басшылығы қаржылық қиындықтардың команданың чемпионаттағы өнеріне әсер етпейтінін айтып, маусымды жалғастырып, барлық міндеттемелерін орындауға ниетті екенін жеткізді.
