Әке иісі сәбидің бейтаныс адамдармен қарым-қатынасын жақсартады – зерттеу

Сурет: istockphoto.com

Әкенің табиғи дене иісі сәбидің бейтаныс ересек адаммен қарым-қатынас кезінде ми белсенділігін үйлестіруге көмектесуі мүмкін. Израиль мен АҚШ ғалымдары жүргізген зерттеу нәтижесі Science Advances журналында жарияланды.

Бұл туралы Qazaqtoday.info сайты хабарлайды.

Зерттеуге 5 айдан 12 айға дейінгі 40 сәби және олардың биологиялық әкелері қатысқан. Ғалымдар алдымен сәбилердің өз әкесімен және бейтаныс ер адаммен қарым-қатынасы кезінде ми белсенділігін салыстырған. Ол үшін екі адамның ми сигналдарын бір мезетте тіркейтін EEG әдісі қолданылды.

Нәтижесінде сәбилердің ми белсенділігі өз әкесімен қарым-қатынас кезінде бейтаныс адаммен салыстырғанда көбірек синхрондалатыны анықталған. Бұл әсіресе зейін, жұмыс жады және көру ақпаратын өңдеумен байланысты альфа-толқындарда байқалған.

Зерттеудің келесі кезеңінде ғалымдар әкенің иісі бұл әсерге ықпал ете ме деген сұрақты тексерген. Ол үшін әкелер екі түн қатарынан таза мақтадан тігілген футболка киіп жүрген. Тәжірибе кезінде сол футболка сәбидің жанына қойылған.

Әкесінің иісі бар кезде сәбидің бейтаныс адаммен ми белсенділігінің синхрондалуы едәуір артқан. Кей жағдайларда бұл көрсеткіш сәбидің өз әкесімен қарым-қатынасы кезіндегі деңгейге жуықтаған.

Сонымен қатар әке иісі болғанда сәбилер бейтаныс адаммен белсендірек әрекет еткен. Олар жиірек күліп, дыбыс шығарып, дене қимылдары арқылы қызығушылық танытқан.

Ғалымдардың пікірінше, әкенің иісі сәби үшін қауіпсіздік пен таныстық белгісі ретінде әсер етуі мүмкін. Бұл балаға отбасы мүшесі емес адамдармен әлеуметтік байланыс орнатуға көмектеседі.

Зерттеушілер әкенің бала күтіміне күнделікті көбірек араласуы да маңызды екенін байқаған. Әкесі тәрбиесіне белсенді қатысатын сәбилерде оның иісіне байланысты нейрондық синхрондау әсері күштірек болған.

Дегенмен зерттеу көлемі шағын болғандықтан, ғалымдар қорытындыны қосымша сынақтармен растау қажет екенін атап өтті. Сондай-ақ тәжірибеде әкенің иісі бар футболка иіссіз футболкамен салыстырылған, сондықтан сәбилердің нақты әкесінің иісіне ме, әлде жалпы адам иісіне ме реакция білдіргені әлі толық анық емес.