Шымкентте асаба есірткі сақтағаны үшін ұсталды
Шымкенттегі қонақ үйде полиция есірткі айналымына күдікті асабаны ұстады. Тінту кезінде мефедрон мен «мак» тәркіленіп, сотқа дейінгі тергеу басталды.
Сурет: Polisia.kz
Шымкент қаласындағы қонақ үйлердің бірінде полиция қызметкерлері есірткі құралдарының заңсыз айналымына қатысы бар деген күдікпен танымал асабаны ұстады.
Бұл туралы Qazaqtoday.info сайты хабарлайды.
Тәртіп сақшыларының мәліметінше, ұсталған азамат — Астана қаласының 36 жастағы тұрғыны, С. есімді ер адам. Тінту кезінде қонақ үй бөлмесінен ақ түсті ұнтақ тәрізді зат салынған полимерлі пакет және өсімдік тектес зат табылып, тәркіленді.
Алдын ала деректер бойынша, ер адаммен бірге интимдік қызмет көрсететін әйел болған.
Ұсталған азамат тәркіленген заттардың мефедрон және «мак» екенін, оларды жеке қолдану үшін сатып алғанын көрсетті.
Тәркіленген заттардың нақты құрамы мен мөлшері анықталуда.
Аталған жайт бойынша сотқа дейінгі тергеу жүргізілуде. Өзге ақпарат Қазақстан Республикасы Қылмыстық іс жүргізу кодексінің 201-бабына сәйкес тергеу мүддесінде жария етуге жатпайды.
