АҚШ соты 75 елге виза шектеуін жойды: Қазақстан да тізімде еді

Фото: kznews AI

Америка Құрама Штаттарының федералды соты Трамп әкімшілігінің 75 елдің, оның ішінде Қазақстан азаматтарына иммиграциялық виза беруді шектеу туралы шешімін заңсыз деп танып, күшін жойды. Бұл туралы журналист Руслан Меделбек өзінің Telegram-арнасында мәлімдеп, kznews.kz порталына сілтеме жасады, деп хабарлайды Qazaqtoday.info сайты.

Нью-Йорк штатының федералды сотының шешіміне сәйкес, АҚШ Мемлекеттік департаментіне азаматтығына қарай иммиграциялық виза беруден бас тартуға жол берілмейді. Бұған дейін Марко Рубио басқарған Мемлекеттік департамент 75 елдің азаматтарына АҚШ-қа иммиграциялық көші-қонға шектеу қойған еді, олардың қатарында Қазақстан да болды. Трамп әкімшілігі бұл шараны елдегі қауіпсіздікті күшейту қажеттілігімен түсіндірген.

Құқық қорғаушылар Мемлекеттік департаменттің бұл шешімін заңсыз деп санап, сотқа шағымданған. Істі қараған судья Жаннетт Варгас мемлекеттік хатшы Марко Рубионың өкілеттігін асыра пайдаланғанын атап өтіп, шектеудің күшін жойды. Сот адамның азаматтығына байланысты иммиграциялық виза беруді тоқтату заңға қайшы деген тұжырымға келген.

Бұл шешім Қазақстан азаматтары үшін нені білдіреді? Егер сот шешімі өз күшінде қалса, АҚШ Мемлекеттік департаменті бұдан былай аталған шектеуге сүйеніп, Қазақстан азаматтарына иммиграциялық виза беруден бас тарта алмайды. Виза өтінімдерін қарау процесі қайта жандануы тиіс. Алайда бұл АҚШ визасы автоматты түрде беріледі дегенді білдірмейді: әр өтініш жеке қаралып, өтініш беруші АҚШ көші-қон заңнамасының талаптарына сай болуы шарт.

Айта кетейік, бұған дейін АҚШ билігі грин-карта лотереясына қатысты да шектеулер енгізген болатын.