«Байтақ» партиясы өңірлік филиалдары сайлаудың алдын ала нәтижелерін мойындады
«Байтақ» партиясының өңірлік филиалдары Құрылтай сайлауының алдын ала нәтижелерін мойындап, жұмыс тәсілдерін жаңарту қажеттігін айтты.
Сурет: turkystan.kz
«Байтақ» жасылдар партиясының өңірлік филиалдары Құрылтай сайлауының алдын ала қорытындысына қатысты пікір білдірді. Батыс Қазақстан, Қарағанды және Ақтөбе облыстарындағы партия бөлімшелерінің өкілдері азаматтардың таңдауын құрметтейтінін және дауыс беру нәтижелерін қабылдайтынын жеткізді, деп хабарлайды Qazaqtoday.info сайты.
Exit poll деректеріне сүйенген өңірлік филиал өкілдері партия ішіндегі жұмыс әдістерін жаңарту қажеттігін де атап өтті. Олардың пікірінше, бұл бағыттағы жұмыстар алдағы уақытта жалғасады.
«Байтақ» партиясының Батыс Қазақстан облыстық филиалының жетекшісі Тұрсынбек Байтемиров Facebook-тегі парақшасында бейнеүндеу жариялап, сайлаушылардың таңдауына құрметпен қарайтынын және жарияланған алдын ала көрсеткіштерді мойындайтынын білдірді.
«Алдағы уақытта бүгінгі нәтижені ескере отырып, өз ұстанымымыз бен бағдарламамызды жүзеге асыруды жалғастырамыз. Қоршаған ортаны қорғау, таза су мен таза жер мәселелері бойынша нақты шешімдерге қол жеткізуге күш саламыз. Жұмысымызды жетілдіріп, келесі сайлауға дайындаламыз», – дейді Байтемиров.
