Украина астанасы Киевке шабуыл жасалып, 6 адам қаза тапты

Киев қалалық әскери әкімшілігінің мәліметінше, шабуыл салдарынан 6 адам қаза тауып, 23 адам жарақат алған, деп хабарлайды QazaqTodayinfo.kz ақпарат порталы DW-ге сілтеме жасап.

Бұған дейін Украина астанасының мэрі Виталий Кличко үш адамның қаза тауып, 20 адамның зардап шеккенін мәлімдеген болатын.

«Олардың 14-і ауруханаға жатқызылды. Қалғандарына медициналық көмек амбулаториялық жағдайда немесе оқиға орнында көрсетілді», – деп жазды Виталий Кличко өзінің Telegram-арнасында.

Соломен ауданында зымыран сынықтары 5 қабатты тұрғын үйдің маңына құлаған. Ғимараттың терезелері сынған, өрт шыққан.

Виталий Кличконың айтуынша, 9 қабатты тұрғын үй де соққыға ұшырап, оның жоғарғы қабаттары қираған.

Тағы бір мекенжайдағы паналау орнында адамдар қамалып қалған. Сол ауданда балалар ауруханасының ғимараты зақымданып, медициналық мекеме аумағындағы автокөліктер өртенген.