«Қайрат» пенальти сериясында «Омонияны» жеңіп, Чемпиондар лигасының үшінші айналымына өтті

Сурет: 1bol.kz

Алматылық «Қайрат» клубы Чемпиондар лигасы іріктеуінің үшінші айналымына шықты деп хабарлайды Qazaqtoday.info сайты.

Екі матчта да алматылықтар сан жағынан артықшылықпен ойнаған. Бір апта бұрын Кипрде өткен бірінші ойында «Омония» 1:0 есебімен жеңіске жеткен еді. Қарымта матч дәл сол есеппен «Қайраттың» пайдасына шешіліп, жеңімпазды анықтау үшін пенальти сериясы қажет болды.

Ойынның 26-минутында кипрлік клуб шабуылшысы Андроникос Какулис дөрекі ойын көрсетіп, алаңнан қуылды. Төреші оған қызыл қағаз көрсеткеннен кейін бір футболшысы артық болған «Қайрат» қарсылас қақпасына қысымды күшейтті. 37-минутта Эдмилсон есепті ашып, алматылықтарды алға шығарды. Кейін команда бірнеше мүмкіндік жасағанымен, есеп өзгермеді.

Қосымша уақытта да гол соғылмады. Пенальти сериясында «Қайрат» қақпашысы Темірлан Анарбеков «Омонияның» шешуші соққысын қайтарып, командасына жеңіс әперді.

Үшінші айналымда «Қайрат» Болгарияның «Левски» клубы мен Румынияның «Университатя Крайова» командасы арасындағы жеңімпазбен кездеседі.