Алматыда электр қуаты тарифтерін көтеру жоспарлануда

Алматы мен Алматы облысында электр энергиясы тарифтерін арттыру жоспарланған, деп хабарлайды Qazaqtoday.info сайты. Krisha.kz-тің хабарлауынша, «Алатау жарық компаниясы» жаңа шекті тарифке өтінім жіберген.

Кәсіпорын тарифті 39,36 теңгеге дейін көтеруді жоспарлап отыр. Өсім 8,3% құрайды. Мақұлданған жағдайда өзгеріс 20 тамыздан бастап күшіне енеді.

Компания тарифтің өсуін электр энергиясын сатып алу құнының артуымен түсіндіреді. 15 шілдеден бастап баға 13 теңгеден 16 теңгеге дейін өсті – бұл шамамен 23%. Алдыңғы өсім 5 маусымда болған еді, қазіргі тариф ҚҚС-сыз 36,33 теңге/кВт·с құрайды.

Мамыр айының басында ҚР Премьер-Министрінің орынбасары – Ұлттық экономика министрі Серік Жұманғарин Қазақстанда жылу және су тарифтерінің өсуінен кейін газ бен теміржол тасымалының бағасы да көтерілетінін мәлімдеген болатын. 1 шілдеден бастап көтерме газ құны 33%-ға өсті.