Астана, Алматы және тағы екі қала тұрғындарына ауа райы ескертуі жасалды
13 шілдеде Астана, Алматы, Өскемен және Риддер қалаларында қолайсыз метеожағдайлар күтіледі. Ауа температурасы мен жел туралы толық болжам.
Сурет: tengrinews.kz
13 шілдеде Астана, Алматы, Өскемен және Риддер қалаларында ауа сапасының нашарлауы күтіледі, деп хабарлайды Qazaqtoday.info сайты. Қазгидрометтің ресми сайтында жарияланған мәліметке сәйкес, бұл қалаларда қолайсыз метеорологиялық жағдайлар салдарынан атмосфералық ауаның беткі қабатында зиянды заттардың жиналуы мүмкін.
Қолайсыз метеорологиялық жағдайлар деп қысқа мерзімді факторлардың (тымық ауа, әлсіз жел, тұман, инверсия) жиынтығын айтады, олар зиянды заттардың жиналуына ықпал етеді. Синоптиктердің болжамы бойынша, Астанада ауа температурасы түнде 18-20 градус, ал күндіз 34-36 градус ыстық болады. Жел оңтүстік-шығыстан соғып, кейін солтүстік-батысқа ауысады, жылдамдығы 3-8 м/с. Жауын-шашын күтілмейді.
Алматыда ауа температурасы түнде 21-23 градус, күндіз 33-35 градус ыстық. Күндіз қысқа мерзімді жаңбыр мен найзағай болуы ықтимал. Жел солтүстік-батыстан 3-8 м/с, күндіз екпіні 13 м/с-қа жетеді.
Өскеменде ауа температурасы түнде 11-13 градус, күндіз 30-32 градус ыстық. Жел солтүстік-батыстан 1-6 м/с, күндіз 5-10 м/с. Шығыс Қазақстан облысында жауын-шашын күтілмейді, күндіз солтүстік пен шығыста найзағай болуы мүмкін. Жел солтүстік-батыстан 9-14 м/с, күндіз солтүстік пен оңтүстікте 15-20 м/с. Ауа температурасы түнде 11-16 градус, күндіз 30-35 градус ыстық, солтүстік пен шығыста 27 градус жылы болады.
