Астанада саяси белсенді Ермек Нарымбай жаңа Конституция туралы әлеуметтік желідегі жазбалары үшін екі айға қамауға алынды, деп хабарлайды Qazaqtoday ақпарат агенттігі.
Бұл ақпаратты оның адвокаты Василий Садыков «Власть» басылымының тілшісіне телефон арқылы растады.
«Кеше оны 3 сәуірге дейін екі ай мерзімге қамауға алды. Оған Қылмыстық кодекстің 430-бабы (Сот үкімін орындамау) бойынша айып тағылып отыр», — деді адвокат.
Адвокаттың айтуынша, бұл айыптауға Нарымбайдың конституциялық реформа туралы өз пікірін білдірген жазбалары себеп болған.
Бұған дейін сот оған «қоғамдық, саяси және әлеуметтік-экономикалық мәселелермен айналысуға» тыйым салған болатын. Былтыр Нарымбай президентті, бас прокурорды, премьер-министрді және басқа да жоғары лауазымды шенеуніктерді атаған әлеуметтік желідегі жазбалары үшін бес тәулікке қамалған еді.
Фото: Әлеуметтік желіден
