ШҚО-дағы шенеуніктің үйінен 122 млн теңге мен $97 мың табылды: Ол ұсталды

Шығыс Қазақстан облысында екі бірдей жоғары лауазымды шенеунік пара алды деген күдікпен қамауға алынды, деп хабарлайды Qazaqtoday ақпарат агенттігі.

Сыбайлас жемқорлыққа қарсы іс-қимыл агенттігінің мәліметінше, облыстық Жолаушылар көлігі және автомобиль жолдары басқармасының басшысы аса ірі көлемде пара алды деп айыпталуда. Тергеу нұсқасы бойынша, ол жол-құрылыс компаниялары мен автобус парктеріне жалпы қамқорлық жасағаны үшін 134 миллион теңге жымқырған.

Оның тұрғылықты жерін тінту кезінде 121,9 миллион теңге мен 97 700 АҚШ доллары көлемінде қолма-қол ақша табылып, тәркіленді.

Бұдан бөлек, Білім беру саласында сапаны қамтамасыз ету департаментінің басшысы да күдікке ілінді. Ол аттестациядан сәтті өткізу үшін педагогтерден жүйелі түрде пара алып отырған.

Сот санкциясымен екі күдікті де қамауға алынды.

Фото: Әлеуметтік желіден