Павлодар облысы Ертіс ауылындағы жеке тұрғын үйде болған өрт салдарынан екі бала ауруханада көз жұмды, деп хабарлайды Qazaqtoday ақпарат агенттігі.
Облыстық Төтенше жағдайлар департаментінің мәліметінше, өрт туралы хабарлама таңғы сағат 8:33-те түскен. Өрт сөндірушілер оқиға орнына үш минут ішінде жеткен.
Құтқарушылар келгенде үй толығымен жанып жатқан. Жиһаз, үй заттары мен шатырды от шарпыған.
«Қиын жағдайға қарамастан, өрт сөндірушілер бірден зардап шеккендерді іздей бастады. Кәмелетке толмаған үш баланы құтқарып, жедел жәрдем бригадасына тапсырды. Тағы бір сәбиді өрт сөндірушілер келгенге дейін алып шыққан. Өкінішке қарай, кәмелетке толмаған екі бала ауруханада көз жұмды», — деп хабарлады департаменттен.
Қазіргі уақытта өрттің шығу себебі анықталып жатыр.
Фото: Әлеуметтік желіден
