Фото: pexels.com
2030 жылға дейін Еуропадағы ірі банктер 200 мыңға жуық қызметкерін қысқарып, жасанды интеллект технологияларын кеңінен енгізуге дайындалып жатыр. Бұл жұмыс күші құрылымын өзгертудің бастамасы ғана екенін сарапшылар айтып отыр.
Банк саласындағы бұл өзгеріс әсіресе операциялық және клиенттермен жұмыс істейтін қызметкерлерге тікелей әсер етеді.
Бұл туралы Qazaqtoday ақпарат агенттігі хабарлайды.
Жаңа технологиялардың арқасында банктер автоматтандырылып, адамдардың қатысуы азаятын процестер көбейген. Соның нәтижесінде, көптеген банк енді ресурстарын оңтайландырып, шығынды азайту жолдарын қарастыруда.
Қазірдің өзінде Еуропадағы ең ірі 35 банктің әрбір оныншы қызметкері жұмыстан қысқартылуы мүмкін деген болжам бар.
Неліктен банктер ЖИ-ге жаппай көше бастады?
Жасанды интеллект банктерге тәуекелдерді бағалау, алаяқтықты анықтау, тұтынушылар сұранысына жедел жауап беру сияқты бағыттарда тиімділік береді. Бұл – қызмет сапасын арттырып, шығысты азайтудың нақты жолы.
Сондықтан көптеген қаржы ұйымдары енді IT-инфрақұрылымды жаңартып, адам ресурсын автоматтандырумен алмастыруды көздейді. Бұл үрдіс Қазақстан банктеріне де уақыт өте келе ықпал етуі мүмкін.
Қазақстандағы банк секторы бұл өзгеріске дайын ба?
Қазақстандағы банктердің кейбірі цифрлық сервистерді енгізіп жатыр. Алайда оған толықтай көшу үшін инфраструктура мен кадрлық оқыту қажет. Болашақта жасанды интеллект біздің елдегі қаржы нарығына да өз әсерін тигізетін болады.
