Спорт 23 желтоқсан · 1 мин оқу

Дүниежүзілік бокс ұйымы Жәнібек Әлімханұлының мәртебесін әзірге сақтап қалды

Фото: Sports.kz

Дүниежүзілік бокс ұйымы (WBO) допинг дауына қарамастан қазақстандық орта салмақтағы чемпион Жәнібек Әлімханұлының мәртебесін әзірге сақтап қалды, деп хабарлайды Qazaq Today ақпарат порталы.

WBO жаңартқан рейтингте Әлімханұлы әлі де өз салмағында әлем чемпионы ретінде көрсетілген. Ал басты үміткерлер үштігіне британдық Дензел Бентли, венесуэлалық Эндри Сааведра және кубалық Йоэнлис Эрнандес енген.

Еске салайық, желтоқсан айының басында, 7 желтоқсанға жоспарланған Жәнібек Әлімханұлы мен WBA чемпионы Эрисланди Лара арасындағы біріктіруші жекпе-жекке санаулы күн қалғанда, қазақстандық боксшының допинг сынамасынан тыйым салынған мельдоний препараты анықталған еді. Соның салдарынан жекпе-жек кейінге шегеріліп, WBO бұл жағдайға байланысты ішкі тергеу бастаған.

Допинг сынамасының «B» үлгісін ашу 8 қаңтарға жоспарланған. Егер екінші сынама да оң нәтиже көрсетсе, Жәнібек Әлімханұлы дисквалификацияға ұшырап, чемпиондық белбеулерінен айырылуы мүмкін.