Шерзод Давлатов дзюдодан әлемдік рейтингте үздік ондыққа енді
Қазақстандық дзюдошы Шерзод Давлатов 60 келіге дейінгі салмақта әлемдік рейтингте 15 сатыға көтеріліп, 3263 ұпаймен 9-орынға жайғасты.
Сурет: olympic.kz
Қазақстандық дзюдошы Шерзод Давлатов Халықаралық дзюдо федерациясының жаңартылған әлемдік рейтингінде алғаш рет үздік ондыққа кірді. 60 келіге дейінгі салмақта белдесетін отандасымыз бірден 15 сатыға көтеріліп, 3263 ұпаймен 9-орынға тұрақтады.
Бұл туралы Qazaqtoday.info сайты хабарлайды.
Мұндай өсім Давлатовтың Бакуде өткен әлем чемпионатындағы жарқын нәтижесінің арқасы. Ол аталған додада финалға дейін жетіп, күміс жүлдегер атанды. Шешуші белдесуде қазақстандық спортшы әзірбайжандық Ахмад Юсифовке есе жіберіп, 60 келі салмақта әлем біріншілігінің күміс медалін иеленді.
Биылғы маусымда Шерзод Давлатов бірнеше халықаралық жарыста тұрақты нәтиже көрсетті. Астанада өткен Qazaqstan Barysy Grand Slam турнирінде қола жүлде алса, Прагадағы European Open жарысында чемпион атанды.
Қазіргі таңда Қазақстан құрамасы сапында әлемдік рейтингте ең жоғары тұрған дзюдошы – 81 келідегі Абылайхан Жұбаназар. Ол 7-орында, ал Давлатов 9-сатыда тұр.
