Қазақстанда 380 мыңнан астам бала бірінші сыныпқа барды

1 қыркүйекте Қазақстан бойынша 380 мыңнан астам бала алғаш рет мектеп табалдырығын аттады. Бұл – жаңа оқу жылының басталуымен бірге елдегі білім саласындағы маңызды оқиға.

Бұл туралы Qazaqtoday.info сайты хабарлайды.

Оқу-ағарту министрлігінің мәліметінше, биылғы оқу жылында еліміздегі 8 мың мектепте 4 миллионнан астам оқушы білім алады. Оның ішінде 227 мың оқушы 11-сыныпты бітіреді.

Бұған дейін министр Жұлдыз Сүлейменова бірінші сыныпқа қабылданған балалардың тілдік бөлінісін жария еткен болатын. Атап айтқанда, оқушылардың 71,1 пайызы қазақ тілінде, 26,6 пайызы орыс тілінде, ал 2,3 пайызы өзге тілдерде білім алуды таңдаған.

Сонымен қатар, ресми деректерге сүйенсек, биылғы жылдың қаңтар-шілде айларында елде жалпы сыйымдылығы 18 090 оқушыны құрайтын 32 жаңа мектеп пен 4 207 балаға арналған 32 мектепке дейінгі мекеме пайдалануға берілді. Олардың ішінде 14 мектеп пен 26 балабақша ауылдық жерлерде орналасқан.