Жаппай жарық сөнді: Бектенов Энергетика министрінен түсініктеме сұрады
Елдің бірқатар өңірінде электр энергиясы жаппай өшкеннен кейін Премьер-министр Олжас Бектенов Энергетика министрі Ерлан Ақкенженовтен жағдайға қатысты түсініктеме сұрады. Үкімет басшысы апаттың нақты себебін анықтап, тексеру нәтижесін баяндауды және мұндай жағдайдың қайталанбауы үшін қандай шара қабылданатынын айтуды талап етті. Ал Энергетика министрлігі оңтүстік өңірлерде электр тапшылығы барын айтып, жаңа энергия нысандарын іске қосуға басымдық беріліп жатқанын мәлімдеді. Алайда электр желілерінің тозуы әлі де өзекті мәселе: Үкімет дерегінде 2029 жылға дейін желілердің тозу деңгейін 67 пайыздан 45 пайызға дейін төмендету жоспарланған. Сондықтан жарықтың жаппай сөнуі энергетика саласындағы қауіпсіздік пен жүйенің тұрақтылығына жауапты министрліктің жұмысына қатысты сұрақты қайта көтеріп отыр. Енді Энергетика министрлігі мәселені жаңа нысандар салу жоспарымен ғана түсіндірмей, мұндай ауқымды ақаудың неге болғанын және оның қайталанбауына кім жауап беретінін нақты айтуы тиіс.
