Қазақстандық оқушы әлемдегі үздік бес жас бағдарламашының қатарына енді
Фото: Оқу-ағарту министрлігі
Ташкент қаласында 92 елден 375 оқушы қатысқан Информатикадан халықаралық IOI 2026 олимпиадасы аяқталды, деп хабарлайды Qazaqtoday.info.
Қазақстан құрамасының төрт мүшесі де жүлде иеленді. Ұлттық құрама 1 алтын және 3 күміс медаль жеңіп алып, әлемдік командалық есепте 10-орынға ие болды. Бұл — Қазақстан құрамасының олимпиада тарихындағы үздік нәтижелерінің бірі.
Астана қаласындағы «Spectrum» халықаралық мектебінің 12-сынып оқушысы Максим Цой алтын медаль жеңіп алып, әлемдік жеке есепте 5-орын иеленді. Осылайша ол әлемдегі үздік бес жас бағдарламашының қатарына енді.
Қазақстан құрамасының күміс медаль иегерлері қатарында Астана қаласындағы дарынды балаларға арналған «Білім-инновация» мамандандырылған лицей-интернатының 11-сынып оқушысы Алдияр Сейтбай, Қызылорда облысындағы осындай лицей-интернаттың 11-сынып оқушысы Мансұр Мамадахунов және Семей қаласындағы физика-математика бағытындағы NIS-тің 12-сынып оқушысы Асқар Әкежан бар. Қазақстан құрамасына Astana IT University бас жаттықтырушысы Темірлан Сатылханов пен International University of Information Technology синьор-лекторы Айбар Қуанышбай жетекшілік етті.
2025 жылы қазақстандық оқушылар 3 күміс және 1 қола медаль жеңіп алып, әлемдік командалық есепте 14-орын иеленген болатын. Биыл ұлттық құрама өз нәтижесін төрт сатыға жақсартты.
Қазақстандық оқушылар Информатикадан халықаралық олимпиадаға қатысқан жылдар ішінде барлығы 79 медаль жеңіп алды
