Қазақстан оқушылары IOI 2026-да 10-орынға ие болды

Сурет: turkystan.kz

Ташкентте 92 елден 375 оқушы қатысқан информатикадан халықаралық олимпиада (IOI 2026) мәресіне жетті. Қазақстан құрамасы 1 алтын және 3 күміс медаль жеңіп алып, командалық есепте әлемдік көшбасшылар қатарынан көрінді, деп хабарлайды Qazaqtoday.info сайты.

Бұл – еліміздің олимпиада тарихындағы үздік нәтижелердің бірі. Астанадағы «Spectrum» халықаралық мектебінің 12-сынып оқушысы Максим Цой алтын медаль иеленіп, жеке есепте әлемдік бестікке енді. Осылайша ол әлемдегі үздік жас бағдарламашылардың қатарына қосылды.

Күміс жүлдегерлер: Астана қаласындағы дарынды балаларға арналған «Білім-инновация» мамандандырылған лицей-интернатының 11-сынып оқушысы Алдияр Сейтбай; Қызылорда облысындағы «Білім-инновация» лицей-интернатының 11-сынып оқушысы Мансур Мамадахунов; Семей қаласындағы физика-математика бағытындағы NIS-тің 12-сынып оқушысы Асқар Әкежан.

Өткен жылы қазақстандық оқушылар 3 күміс және 1 қола медаль жеңіп алып, командалық есепте 14-орында болған еді. Информатикадан халықаралық олимпиадаға қатысқан жылдары еліміздің қоржынына барлығы 79 медаль түсті.