Қазақстанда креативті индустрия жаңа экономикалық драйверге айналып келеді
Салада жұмыспен қамтылғандар саны артып, креативті жобаларды қолдауға арналған жаңа тетіктер іске қосылуда.
Соңғы жылдары Қазақстанда креативті индустрияны дамыту мемлекеттік саясаттың маңызды бағыттарының біріне айналды. Бұл сала тек мәдениет пен өнердің ғана емес, экономиканың да өсіміне әсер ететін перспективалы сектор ретінде қарастырылып отыр, деп хабарлайды Qazaqtoday.info ақпарат агенттігі.
Мемлекет басшысы бірнеше рет халыққа арнаған Жолдауларында шығармашылық индустрияларды қолдаудың маңыздылығына тоқталып, олардың ұлттық экономиканы әртараптандырудағы рөлін атап өткен болатын. Бүгінде Қазақстандағы креативті индустрия 12 негізгі бағытты қамтиды. Олардың қатарында ақпараттық технологиялар, дизайн, сәулет, сән индустриясы, қолөнер, медиа, кино және басқа да шығармашылық қызмет түрлері бар.
Ресми деректерге сәйкес, елде креативті индустрия саласында жұмыс істейтін кәсіпкерлік субъектілерінің саны 45 мыңнан асты. Олардың басым бөлігі Астана мен Алматы қалаларында шоғырланған. Сонымен қатар Шымкент қаласы мен Түркістан облысында да бұл бағыттағы белсенділік жоғары.
Саладағы ең көп таралған бағыттардың бірі – ұлттық қолөнер. Бұл салада мыңдаған шебер еңбек етіп, дәстүрлі өнерді заманауи нарық талаптарына бейімдеп келеді. Жалпы алғанда, креативті экономика секторларында 140 мыңнан астам адам жұмыспен қамтылған. Әсіресе ІТ, сәулет, сән индустриясы, мәдениет мекемелері, музейлер мен кітапханалар еңбек ресурстарын көп қажет ететін бағыттар саналады.
Сарапшылардың пікірінше, креативті индустрияның дамуы шикізатқа тәуелділікті азайтып, интеллектуалдық капиталдың үлесін арттыруға мүмкіндік береді.
Экономист Нұрлан Жақыповтың айтуынша, әлемдік тәжірибе шығармашылық индустриялардың ел экономикасына елеулі үлес қоса алатынын көрсетіп отыр.
«Қазіргі таңда жаһандық экономикада идея мен зияткерлік өнімнің құны артып келеді. Қазақстан үшін креативті индустрия жаңа жұмыс орындарын құруға, жастардың әлеуетін ашуға және экспорттық мүмкіндіктерді кеңейтуге жол ашады. Сондықтан бұл саланы қолдау ұзақмерзімді экономикалық саясаттың маңызды бөлігі болуы тиіс», – дейді сарапшы.
Саланы дамыту мақсатында соңғы жылдары бірқатар заңнамалық және институционалдық өзгерістер қабылданды. Креативті қызметтің ондаған түрі арнайы салықтық режимге енгізіліп, кәсіпкерлер үшін жеңілдетілген шарттар қарастырылды. Нәтижесінде көлеңкелі секторда жұмыс істеген көптеген шығармашылық кәсіп иелері ресми тіркеліп, мемлекеттік қолдау құралдарына қол жеткізе бастады.
Креаторларға арналған инфрақұрылымды дамыту да жалғасуда. Бүгінде еліміздің ірі қалаларында шығармашылық хабтар жұмыс істейді. Олар жас кәсіпкерлер мен шығармашылық өкілдеріне білім алуға, жобаларын дамытуға және серіктестер табуға мүмкіндік береді. Сонымен қатар креативті индустрия парктері мен мамандандырылған білім беру орталықтары ашылып жатыр.
2026 жылы креативті индустрияны қолдауға бағытталған қаржылық құралдарды кеңейту мәселесіне ерекше назар аударылуда. Бұл бағытта жобаларды халықаралық нарықтарға шығаруға, экспорттық әлеуетті арттыруға және таланттарды қолдауға арналған жаңа бағдарламалар іске асырылуда.
Сарапшылардың бағалауынша, алдағы жылдары креативті экономика Қазақстанның тұрақты дамуына ықпал ететін негізгі салалардың біріне айналуы мүмкін. Өйткені бүгінгі таңда шығармашылық өнімдер мен қызметтердің бәсекеге қабілеттілігі елдің инновациялық әлеуеті мен адами капиталының деңгейін айқындайтын маңызды көрсеткіштердің біріне айналып отыр.
Фото: aikyn.kz
