«Медбике болып қоңырау шалады»: Астанада алаяқтар емханалардың атынан SMS код сұрап жүр
Фото: Pixabay
Азаматтарға күмәнді қоңыраулардан сақтанып, ресми мекемелермен байланысқа шығу ұсынылады, деп жазады Qazaq Today ақпарат порталы.
Астана қаласының Қоғамдық денсаулық сақтау басқармасы емханалар скринингке шақыру кезінде ешқашан SMS код сұрамайтынын мәлімдеді.
Құзырлы ведомствоның хабарлауынша, «Соңғы уақытта белгісіз адамдар емхана қызметкерлері ретінде қоңырау шалып, ‘скринингке жазылуды растау үшін’ SMS арқылы келген кодты сұрап жүргені анықталды».
Бұған дейін елордалық тұрғын үйлердің біріндегі WhatsApp чатта Юлия есімді келіншек анасының тәжірибесін бөліскен.
Белгісіз адам өзін емхананың медбикесі ретінде таныстырып, скринингке шақырған. Кейін ол «тіркеуді растау үшін SMS кодты айтыңыз» деп өтінген. Анасы қызына хабарласып, осы арқылы алаяқтардың арбауынан аман қалған.
Денсаулық сақтау басқармасы азаматтарды алаяқтыққа алданып қалмауға, сондай-ақ медициналық ұйымдар атынан хабарласып, SMS код сұрайтын тұлғаларға сенбеуге шақырады.
