Алтын Шағаева күрестен әлем чемпионатында қола жүлдеден құр қалды
Алтын Шағаева Астанадағы күрестен әлем чемпионатында 59 келіге дейінгі салмақта қола медаль үшін белдесуде Моңғолия балуанына жеңіліп, бесінші орынмен аяқтады.
Сурет: Сали Сабиров
Астанада өтіп жатқан күрестен 2026 жылғы әлем чемпионатында қазақстандық балуан Алтын Шағаева қола медаль үшін белдесуде жеңіліске ұшырады. 59 келіге дейінгі салмақ дәрежесінде өнер көрсеткен отандасымыз жарысты бесінші орынмен аяқтады.
Бұл туралы Qazaqtoday.info сайты хабарлайды.
Үшінші орын үшін өткен шешуші белдесуде Алтын Шағаева Моңғолия өкілі Болортуя Хурэлхуумен кездесті. Алайда қазақстандық спортшы қарсыласына төтеп бере алмады. Моңғолиялық балуан бірінші кезеңнің өзінде басымдық танытып, кездесуді мерзімінен бұрын аяқтады.
Осылайша, Алтын Шағаева әлем чемпионатының қола жүлдесін иелену мүмкіндігін пайдалана алмады.
Қазақстандық балуан әлем біріншілігін сәтті бастаған болатын. Алғашқы кездесуінде ол Түркия өкілі Бедиха Гюнді 3:1 есебімен жеңді. Одан кейін ширек финалда Польшадан келген Йовита Вжесеньмен белдесіп, 5:1 есебімен басым түсті.
Осы нәтижелердің арқасында Шағаева жартылай финалға жолдама алған. Алайда финалға шығу үшін өткен белдесуде Үндістан өкілі Манишадан жеңілді. Соған қарамастан, отандасымыз қола медаль үшін күресу мүмкіндігін сақтап қалған еді. Бірақ шешуші кездесуде моңғолиялық спортшы басым түсті.
