Астаналық әйел маркетплейс арқылы алдап, 6 жылға сотталды

Фото: Newtimes.kz/ Турар Казангапов

Астана тұрғыны маркетплейсте сауда жасауды үйретемін деп, азаматтардың ақшасын алдап алып, сот үкімімен бас бостандығынан айырылды. Бұл туралы Астана прокуратурасы хабарлады.

Бұл туралы Qazaqtoday.info сайты хабарлайды.

Әйел әлеуметтік желілер арқылы маркетплейсті басқару бойынша оқыту курстарын ұсынған. Оқыту барысында ол жәбірленушілердің сеніміне кіріп, маркетплейс арқылы тауар сатып алуға және одан әрі сатуға ақша салуды ұсынып, қаражатты пайдасымен қайтарамын деп уәде берген.

Алайда алынған ақшаны әйел өз қалауынша жұмсап жіберген.

«Қылмыстық әрекеттердің салдарынан бес жәбірленушіге жалпы сомасы 15,6 млн теңге материалдық шығын келтірілді», — делінген ведомство хабарламасында.

Сот оны алаяқтық жасағаны үшін кінәлі деп таныды. Бұрынғы соттылығын ескере отырып, оған алты жыл бас бостандығынан айыру жазасы тағайындалды. Жәбірленушілердің азаматтық талаптары қанағаттандырылды.

Бұған дейін Астанада алаяқтық схемасының 24 қатысушысы 8 жылдан түрме жазасын алған. Олар SIM-box құрылғысына қосылған телефон нөмірлері арқылы азаматтарға алаяқтық қоңыраулар жасағаны анықталды. Қылмыскерлер мемлекеттік органдардың, банктердің, «Қазпошта» АҚ және басқа да ұйымдардың қызметкерлері ретінде танылып, азаматтардан растау кодтарын алып, оларды несие рәсімдеуге және ақша аударуға көндірген.