Тоқаев Aurubis AG байқаушылар кеңесінің төрағасын қабылдады
Қасым-Жомарт Тоқаев Aurubis AG байқаушылар кеңесінің төрағасы Фриц Варенхольтты қабылдап, тау-кен металлургиясындағы бірлескен жобалар мен ынтымақтастық перспективаларын талқылады.
Сурет: Ақорда
Мемлекет басшысы Қасым-Жомарт Тоқаев Aurubis AG байқаушылар кеңесінің төрағасы Фриц Варенхольтты қабылдады.
Бұл туралы Qazaqtoday.info сайты хабарлайды.
Кездесу барысында Қазақстанның тау-кен металлургиясы кешеніндегі бірлескен инвестициялық жобаларды іске асыру перспективасы талқыланды.
Президент Германияның Қазақстан үшін Еуропадағы негізгі экономикалық және технологиялық серіктестердің бірі екенін атап өтті.
Оның айтуынша, отандық өнеркәсіптің басым міндеттерінің бірі – шикізат шығарудан металды терең өңдеуге, озық технологияларды енгізуге және қосылған құны жоғары өнім өндірісі моделіне көшу.
Ықпалдастықтың негізгі бағыттары ретінде құрамы күрделі мыс шикізатын кешенді өңдеу, ілеспе металдарды алу, қайта өңдеуді дамыту және өңдеудің кейінгі сатысындағы өндіріс нысандарын жергіліктендіру айқындалды.
Елімізде мыс сынықтарын және техногендік минералдар түзілімін қайта өңдеу бойынша «Тау-Кен Самұрық» ұлттық компаниясы мен Aurubis арасындағы ынтымақтастық әлеуетіне ерекше назар аударылды.
Сонымен қатар аталған бағыттағы келешегі бар жобаларды жүзеге асыру жөніндегі бірлескен іс-шаралар жоспарын әзірлеу мүмкіндігі қарастырылды.
