«Қайсар» Қазақстан кубогының финалына жолдама алды
Қызылордалық «Қайсар» футбол клубы Қазақстан кубогының жартылай финалында «Жеңісті» жалпы есеп 5:4-пен ұтып, финалға шықты. Финалда «Ордабасымен» кездеседі.
Сурет: turkystan.kz
Қызылордалық «Қайсар» футбол клубы Қазақстан кубогының жартылай финалында елордалық «Жеңіспен» болған екі ойынның қорытындысы бойынша финалға шықты, деп хабарлайды Qazaqtoday.info сайты.
Қарымта кездесу «Астана Арена» стадионында өтіп, алаң иелері 3:2 есебімен жеңіске жетті.
«Жеңіс» сапында хорватиялық шабуылшы Андрия Филипович дубль жасап, 25 және 75-минуттарда гол соқты. Тағы бір допты 18-минутта бразилиялық жартылай қорғаушы Гьяа душ Сантуш Мартинш қақпаға дәл бағыттады.
Ал «Қайсар» сапынан бразилиялық вингер Микейас 69-минутта мергендік танытса, Рамазан Бағдат 90-минутта командасының екінші голын соқты.
Қызылордада өткен алғашқы жартылай финалдық кездесуде «Қайсар» 3:1 есебімен жеңіске жеткен еді.
Осылайша, екі матчтың қорытындысы бойынша жалпы есеп 5:4 болып, «Қайсар» Қазақстан кубогының финалына жолдама алды.
Финалда қызылордалық клуб «Ордабасымен» кездеседі.
