АҚШ-та Қытай азаматтарына арналған жалған неке желісі әшкереленді
АҚШ-та Қытай азаматтарына грин-карта алу үшін ұйымдастырылған жалған некелердің ең ірі желісі әшкереленді. 11 адамға айып тағылды, қызмет құны 100 мың долларға жеткен.
Сурет: egemen.kz
Америка Құрама Штаттарында Қытай азаматтарына грин-карта алуға көмектесу мақсатында құрылған жалған некелердің еліміздегі ең ірі желісі анықталды. Бұл туралы АҚШ Әділет министрлігі мәлімдеді, деп хабарлайды Qazaqtoday.info сайты.
Схеманы ұйымдастырды деген күдікпен 11 адамға айып тағылды. Тергеу деректеріне сүйенсек, олар мыңнан астам жалған неке қиюды ұйымдастырған. Мұндай қызметтің құны 100 мың долларға дейін жеткен. Бұл сомаға үйленуге ұсыныс жасау сәтін бейнелейтін фотосуреттер, үйлену тойының фотосессиясы және иммиграциялық сұхбатқа дайындық бойынша нұсқаулық кірген.
Жалған некеге келіскен АҚШ азаматтарына үйлену тойы үшін 30 мың долларға дейін төленген. Некелер тек АҚШ-та ғана емес, Қытайда да қиылған.
Биыл ақпан айында АҚШ-та Қытай азаматтарымен жалған неке ұйымдастырудың тағы бір схемасы әшкереленген болатын. Алайда ол кезде тек америкалық әскери қызметшілер тартылған. Олардың жұбайлары иммиграциялық мәртебе алумен қатар, әскери нысандарға кіруге мүмкіндік алған.
