Атыраудағы кәріз жөндеуіне қатысты сыбайлас жемқорлық ісінің жаңа мәліметтері
Атыраудағы кәріз жөндеуіне қатысты сыбайлас жемқорлық ісі бойынша жаңа мәліметтер: 100 млн теңге пара, мердігерлердің ЖСҚ-дағы қателерге байланысты жұмысты тоқтатуы және жаңа сметалар.
Сурет: azh.kz
Атыраудағы кәріз желілерін жөндеуге байланысты сыбайлас жемқорлық тергеуінің жаңа мәліметтері белгілі болды, деп хабарлайды Qazaqtoday.info сайты.
Шілде айының басында ҰҚҚ қызметкерлері қала әкімінің міндетін атқарушы Тілек Махуовты ұстады. Ол 100 миллион теңге көлемінде пара алды деген күдікке іліккен. Тергеу облыс орталығындағы кәріз желілерін ұзаққа созылған қымбат жөндеуге қатысты болуы мүмкін.
Жергілікті билік бірнеше жыл бұрын кәріздің жай-күйіне алаңдай бастады. Қаладағы 295 шақырым құбырдың 39,7 шақырымы авариялық немесе аварияға дейінгі жағдайда болған. Кейбір коллекторлар әлі 60-70-жылдары асбестен салынған.
Атырау қаласы әкімдігінің дерегінше, 2022 жылы «Шындау» ЖШС кәріз желілерін күрделі жөндеуге жобалау-сметалық құжаттаманы (ЖСҚ) әзірлеген, бірақ тек 33,4 шақырымға. Бюджеттен 19 миллиард 717 миллион теңге бөлінген.
Жұмыстар үш кезеңге жоспарланған: 4,8 млрд, 3,3 млрд және 1,9 млрд теңге. Бірінші және екінші кезеңнің тендерін «Сапа құрылыс 2007» компаниясы, үшіншісін «Агидель-Ас» ұтып алды.
Күрделі жөндеу 2024 жылдың ортасында басталған, бірақ айтарлықтай қиындықпен өтті. «Атырау облысы Су Арнасы» КМК басшысы Мейірім Қалауидың айтуынша, мердігерлер белгілі бір көлемді орындаған, алайда кейін жұмысты тоқтатып, ЖСҚ-да көп қателер бар екенін айтып, түзету енгізуді талап еткен.
Қала әкімдігінің әкім орынбасары Мейіржан Мұқасов қол қойған жауабында түзетуді сол «Шындау» ЖШС-не тапсырғаны хабарланған. Сонымен қатар, әр кезеңнің жаңа құны аталған: 8,8 млрд, 7,7 млрд және 3,1 млрд теңге. Бастапқы мерзім бұзылғандықтан, жөндеуді аяқтау мерзімі осы жылдың соңына белгіленген. Екі жыл ішінде мердігерлер небәрі 13,4 шақырым кәріз коллекторын жөндеген.
