Фото: Stan.kz
Ақтөбе қаласы әкімі аппаратының бұрынғы басшысы Нұрсұлтан Исембайұлы алаяқтық жасағаны үшін 3 жылға бас бостандығынан айырылды. Сот үкімі оқылғаннан кейін ол бірден қамауға алынды, деп хабарлайды Qazaqtoday.info порталы Stan.kz-ке сілтеме жасап.
Тергеу мәліметінше, экс-шенеунік 2022 жылы жер телімін алып беруге көмектесемін деп жергілікті тұрғыннан 3 миллион теңге алған. Алайда уәде етілген жер телімі де берілмеген, ақша да қайтарылмаған.
Исембайұлы кінәсін мойындамай, оқиға болған уақытта басқа жерде жүргенін айтқан. Алғашқы сот оны ақтағанымен, прокуратураның наразылығынан кейін іс қайта қаралды.
Қайта сот талқылауы кезінде оның алибиі расталмай, ұялы байланыс деректері мен басқа да дәлелдер сотталушының әкімдік маңында болғанын көрсеткен. Нәтижесінде сот оны кінәлі деп танып, 3 жылға соттады және өмір бойы мемлекеттік қызмет атқару құқығынан айырды.
