Сауд Арабиясында өткен Испания Суперкубогының финалында «Барселона» мадридтік «Реалды» жеңіп, чемпиондық атағын сәтті қорғап қалды, деп хабарлайды Qazaqtoday ақпарат агенттігі.
Екі грандтың текетіресіне ұласқан ойын 3:2 есебімен каталониялық клубтың пайдасына шешілді. Бұл кездесу нағыз голдар мен эмоцияға толы драма болды.
Ойынның 36-минутында Рафинья есеп ашып, «Барселонаны» алға шығарды. Алайда бірінші таймның соңында командалар жанкүйерлерге нағыз триллер сыйлады. Алдымен 45+2 минутта Винисиус таразы басын теңестірсе, араға екі минут салып Роберт Левандовски каталониялықтарды қайтадан алға шығарды. Бірақ мадридтіктер де қарап қалмай, 45+6 минутта Гонсало Гарсияның голымен үзіліске тең есеппен кетті.
Кездесу тағдырын шешкен голды 73-минутта тағы да Рафинья соғып, матчта дубль авторы атанды. Ойын соңына қарай «Барселона» ойыншысы Фрэнки Де Йонг алаңнан қуылғанына қарамастан, команда жеңісті уысынан шығармады.
Осылайша, «Барселона» қатарынан екінші жыл Испания Суперкубогының жеңімпазы атанды. Өткен жылы олар финалда «Реалды» 5:2 есебімен ойсырата жеңген болатын. Бұл жеңіс каталониялықтардың 25 қарашадан бергі барлық турнирдегі 10-шы жеңісі болса, «Реалға» қарсы соңғы алты ойынның бесеуінде басым түсіп отыр.
Фото: Әлеуметтік желіден
