18 жастағы қазақстандық теннисші Әмір Омарханов Тунистің Монастир қаласында өткен ITF M15 турнирінде жеңіске жетіп, кәсіби мансабындағы төртінші титулына қол жеткізді, деп хабарлайды Qazaqtoday ақпарат агенттігі.
Тартысқа толы финалда Омарханов турнирдің басты фавориті саналған, әлемнің 383-ракеткасы, түркиялық Мерт Алкаймен кездесті. Жас спортшымыз үш сетке созылған аса қиын ойында 7:5, 1:6, 7:5 есебімен мықтылығын дәлелдеп, жеңісті жұлып алды.
Бұл – жас таланттың ересектер арасындағы кәсіби деңгейдегі төртінші ірі жеңісі. Бұған дейін Әмір Тунис пен Испания корттарында жекелей және жұптық сында сәтті өнер көрсеткен болатын. Монастирдегі жеңіс қазақстандық спортшыға ATP live-рейтингінде 643-орынға көтерілуге мүмкіндік берді.
Фото: Әлеуметтік желіден
