Танымал блогерлер Ерболат Жанабылов пен Эльмира Төлегенованың ісіне қатысты тергеу аяқталды. Ерлі-зайыптылар үйқамаққа алынып, енді сот алдында жауап береді, деп хабарлайды Qazaqtoday ақпарат агенттігі.
Оларға заңсыз кәсіпкерлікпен айналысып, ақша жымқырды деген айып тағылып отыр. Қаржылық мониторинг агенттігінің мәліметінше, ерлі-зайыптылар Instagram желісіндегі 15 миллионнан астам оқырманының сенімін пайдаланып, заңсыз табыс тапқан. Олар онлайн-курстар сату арқылы жұртты алдаған. Іс жүзінде адамдар курсты білім алу үшін емес, қымбат көліктер мен ақшалай сыйлықтар ойнатылатын ұтыс ойынына қатысу үшін сатып алған.
«Тексеріс барысында курстардың шынайы білім беретін құндылығы жоқ екені анықталды. Бейнежазбалардың бір бөлігі YouTube сияқты ашық дереккөздерден алынып, заңсыз лотереяны жасыру үшін ғана қолданылған. Сыйлықтар блогерлердің жеке қаражатынан емес, қатысушылардың өз ақшасынан төленген. Сондай-ақ, электронды „сәттілік барабаны“ көбіне 5000 теңгелік ұтыс түсетіндей етіп бапталған, ал қымбат сыйлықтарды ұтып алу мүмкіндігі әдейі төмендетілген», — деп хабарлады Қаржылық мониторинг агенттігі.
Бұдан бөлек, блогерлер оқырман санын арттыру үшін ең көп репост жасаған қатысушыға 11-ші көлікті сыйлаймыз деп уәде берген. Алайда, жеңімпаз анықталмаған, көлік те ешкімге берілмеген.
Нәтижесінде олардың бақылауындағы «Zhana Business» ЖШС шотына 247,5 млн теңге түскен. Оның 60 млн теңгесі депозиттерге салынған.
Сот шешімімен 10 көлікке, оның ішінде Lamborghini Urus және Lexus LX 600 сияқты қымбат көліктерге, сондай-ақ 17 iPhone телефонына тыйым салынды.
Қазіргі уақытта күдіктілерге қатысты «үйқамақ» бұлтартпау шарасы таңдалды. Олар іс материалдарымен танысып жатыр.
Фото: Әлеуметтік желіден
