Ақтөбеде тұрақтандыру қорынан сатылымға шығарылған көкөністердің сапасына қатысты дау туындады. Жергілікті тұрғындар супермаркет сөрелерінде шіріген картоп пен сәбіздің толып кеткеніне шағымдануда, деп хабарлайды Qazaqtoday ақпарат агенттігі.
Тұрғындардың айтуынша, бағасы арзан болғанымен, көкөністердің сапасы сын көтермейді. Осының кесірінен сұраныс та өте төмен.
«Қаптағы көкөністерді сұрыптау уақытты алады. Жарамсыз тауарды жеткізушіге қайтарып, келесі күні жаңасын алдырамыз», — деп түсіндірді сауда желілерінің өкілдері.
Тұрақтандыру қоры биыл 9 мың тонна картоп пен 2 мың тонна сәбіз сатып алған. Жауапты мекеме өкілдері әлеуметтік маңызы бар азық-түлік өнімдерінің сапасы апта сайын тексерілетінін мәлімдеді.
Сондай-ақ бағаны тұрақтандыру үшін жергілікті фермерлермен арнайы келісімдер жасалған. Егер өнім сапасыз болса, шаруалар оны кері алып кетуге міндетті.
Фото: Әлеуметтік желіден
