ChatGPT-ді жасаушы OpenAI компаниясы ғылыми қауымдастыққа арналған жаңа өнімін таныстырды. Prism деп аталатын бұл редактор ғылыми мақалалар мен дипломдық жұмыстарды LaTeX форматында жазуды айтарлықтай жеңілдетуге арналған, деп хабарлайды Qazaqtoday ақпарат агенттігі.
Жаңа редактордың басты ерекшелігі – оған GPT-5.2 жасанды интеллект моделінің тікелей біріктірілуі. Осының арқасында Prism құжаттың құрылымын, күрделі формулаларды және әдебиеттерге жасалған сілтемелерді толық түсіне алады.
Пайдаланушылар жасанды интеллект көмегімен мәтінді жазып, оны лезде өңдей алады. Сонымен қатар, бағдарлама қажетті әдебиеттерді өздігінен іздеп, дәйексөздерді мақалаға автоматты түрде енгізеді. Ең қызықты мүмкіндіктерінің бірі – тақтаға жазылған теңдеулерді суретке түсіріп, оны LaTeX форматына лезде аудару функциясы. Prism-де бірнеше автордың бір уақытта жұмыс істеуіне ешқандай шектеу қойылмаған.
Редактор браузерде жұмыс істейді, сондықтан компьютерге ешқандай қосымша бағдарлама орнатудың қажеті жоқ. Дегенмен, OpenAI бұл құралды «шартты түрде тегін» деп отыр. Яғни, оны тек ChatGPT аккаунты бар қолданушылар ғана пайдалана алады. Қызметтің нақты қандай жазылым иелеріне қолжетімді екені әзірге нақтыланбаған.
Фото: Әлеуметтік желіден
