Қазақ билігі 2025 жылы ғарышқа зымыран ұшырмақ
Қазақстан 2025 жылы ғарышқа өз зымыранын ұшырады. Бұл туралы Цифрлық даму, инновациялар және аэроғарыш өнеркәсібі министрі Жасұлан Мәдиев мәлімдеді, деп хабарлайды Qazaq.today.
«Зымыран тасығыштың материалдары мен бөлшектерін әзірлеу бойынша жұмыстар жүргізіліп жатыр. Зымыранның қоспа отынының прототипі жасалды. Метеорологиялық зымыранды ұшыру 2025 жылға, ал аса жеңіл зымыранды сынақтан өткізу мерзімі 2030 жылға жоспарланған», — деді министр.
Оның айтуынша, коммерциялық ұшырулар 2028 жылдан басталады деп жоспарланған.
Жасұлан Мәдиев 2027 жылы ұшыру жоспарланған Жерді қашықтықтан зондтау үшін үш спутник жасауға келісімшарт жасалғанын атап өтті. Сонымен қатар спутникті өндіру бойынша Моңғолиямен экспорттық келісімшарт жасалған.
«Спутниктік байланыс желілері мен телехабар таратудың үздіксіз қызметін қамтамасыз ету үшін 2029 жылға қарай KazSat-3 байланыс спутнигін ауыстыру жоспарланып отыр. Қазір жоба бойынша оған дейінгі жұмыстар жүргізілуде. 2025 жылға дейін спутникті жасау туралы келісімшартқа қол қою жоспарланған, – деді министр.
