Фото: pexels.com
Әлемнің 5-ракеткасы Елена Рыбакина Австралияда өтетін WTA 500 санатындағы Brisben турниріндегі алғашқы қарсыластарының кім болатынын білді. Ол жарысты үшінші нөмірлі сеянс ретінде бастап отыр.
Бұл туралы Qazaqtoday ақпарат агенттігі хабарлайды.
Рыбакина жоғары рейтингінің арқасында алғашқы айналымды автоматты түрде өткізіп жібереді. Екінші кезеңде америкалық Эшлин Крюгер мен іріктеуден өткен теннисшінің арасындағы кездесудің жеңімпазымен кортқа шығады.
Турнирдің жартылай финалында ол әлемнің бірінші ракеткасы Арина Соболенкоға қарсы шығуы мүмкін. Айта кетсек, 2024 жылғы бұл турнирде Рыбакина финалда дәл осы Соболенконы ұтып, чемпион атанған болатын.
Brisben турнирінде тағы кімдер бақ сынауда?
Рыбакинамен бір бөлімде ресейлік Екатерина Александрова да бақ сынап жатыр. Бұл оның жолындағы ықтимал қарсыластардың бірі екенін көрсетеді.
Ал Қазақстанның тағы бір өкілі Юлия Путинцева турнирдің негізгі кезеңіне өте алмады. Ол іріктеу финалында жергілікті спортшы Оливия Гадекиге жол берді.
