Әкімдік жұмысы салғырт: Шучинскіде асфальт екі аптаға жетпей ойылып түсті, жүргізушілер жолда жүруге қорқады

Щучинск қаласында жаңа төселген асфальттың сапасы сын көтермеді. Бар болғаны бірнеше апта өтпей жатып, жолдың беті опырылып, терең шұңқырға айналды. Қала ортасында пайда болған бұл ойық тұрғындардың ашу-ызасын туғызды, деп жазады Qazaq Today ақпарат порталы.

Жолдың орнына қақпан

Әлеуметтік желілерде тараған видеодан жолдың қақ ортасында пайда болған шұңқыр анық көрінеді. Жаяу жүргінші де, көлік жүргізушісі де сол маңнан өтуге қорқады. «Күні кеше ғана асфальт төсеген еді. Міне, сапасы белгілі болды – халыққа қақпан қазып бергендей», – дейді ашулы тұрғындар.

Кейбірі жағдайдың қаншалықты қауіпті екенін ескертті. «Бес метр радиуста жүрудің өзі қорқынышты. Машина түсіп кетсе не болады? Ал адам немесе жануар құласа кім жауап береді?» – деп жазады қала тұрғындары.

Жергілікті билік бұған дейін «барлық жұмыстар технологияға сай атқарылды» деп есеп берген. Бірақ шындық мүлде басқаша шықты. «Технология дейсіздер ме? Міне, нәтижесі. Екі апта өтпей жатып асфальт ойылып түсті. Осылай жалғаса берсе, бүкіл қала көшелері қақырап құламай ма?» – деп ашынды желідегілер.

Жүргізушілер де наразы. «Жақында ғана жаңа асфальтқа ақша төкті. Енді қайтадан қазып, қайтадан жамайды. Бұл – халықты алдау. Сапасыз жұмыстың зардабын тек тұрғындар тартып отыр», – дейді олар.

Басқалары түнгі уақытта жағдайдың тіпті қауіпті екенін айтады. «Жарық аз, қоршау жоқ. Жаяу жүрген адам байқамай құлап кетуі мүмкін. Бұл – нағыз қылмыс», – дейді жұрт.

Қала әкімдігі мәселенің себебін ауыр жүк көлігінің соққысынан көрді. «Құдық қақпағы зақымданған, мердігер компания қалпына келтіру жұмыстарын жүргізеді» деген қысқа мәлімдеме жасады.

Алайда тұрғындар бұған сенбейді. «Әр нәрсеге көлікті кінәлай береді. Ал неге алдын ала тексермейді? Неге сапасыз асфальт төсейді? Бізге бос уәде емес, нәтиже керек!» – дейді ашулы жұрт.