Назарбаев Түркияда жер сілкінісінен зардап шеккендерге 500 000 доллар аударды
Нұрбол Назарбаев Түркияда жер сілкінісінен зардап шеккендерге көмек ретінде жарты миллион доллар аударды. Қаражат «Салиқалы ұрпақ» қоғамдық қорының атынан жіберілді. Түркияның Қазақстандағы төтенше және өкілетті елшісі Уфук Екиджи екіжақты кездесуден соң мәлімдеді. Тараптар жер сілкінісінен кейінгі жағдайда басқа да қандай көмек көрсете алатыны жөнінде кеңесті. Елші қиын сәтте барынша жан-жақты қолдау көрсетіп жатқан қазақстандықтарға алғыс білдірді.
«Қиын кезеңге тап болған бауырлас Түркия халқына «Салиқалы ұрпақ» қоғамдық қоры қаржылай көмек көрсету туралы шешім қабылдады. Біз жер сілкінісінен зардап шеккендерге жарты миллион доллар аудардық. Қаражат алғашқы керек-жарақ заттар мен дәрі-дәрмек сатып алуға және өзге де қажеттіліктер үшін жіберілді. Бауырларымыз бен әпке-қарындастарымыз бастарына түскен қиыншылықты көп ұзамай еңсерсін деп тілейміз!» — деді қор директоры Қасым Қасабеков.
2016 жылы құрылған қайырымдылық қоры халықтың осал топтарына білім беру және денсаулық сақтау салаларында көмектесуге негізделген. Осы уақытқа дейін қор қайырымдылық іс-шаралар мен акцияларға 1 миллиард теңгеге жуық қаржы аударыпты.
«Алматы және Алматы облысындағы мұқтаж отбасыларға 1000 ноутбук таратып, ел бойынша 3 мешіт салды.
Коронавирус инфекциясымен күреске 150 миллион теңге бөліп,
Мақтаарал ауданында болған су тасқынынан зардап шеккендерге 20 үй тұрғызылды.
Алматы және Алматы облысындағы мұқтаж отбасыларға 5 үй мен 5 пәтер бердік.
«Қазақстан халқына» әлеуметтік қорына 1 миллиард теңге аудардық.
Алматы және Алматы облысындағы көмекке мұқтаж және көпбалалы отбасылардағы 2 000 оқушыға канцеляриялық заттарға толы рюкзактар таратылды. Қор нағыз көмекке мұқтажы, ел басына күн туған сәттерде көмеке келуге тырысамыз»,- деді қор жетекшісі.
Айта кетейік, Қазақстан Президенті Қасым-Жомарт Тоқаев Үкіметке Түркия еліндегі апатты жер сілкінісінен зардап шеккендерге жедел көмек көрсету үшін 1 миллион доллар қаржы бөлуді тапсырған еді. Жалпы, қазіргі уақытқа дейін қазақстандықтар Түркия тұрғындарына көмек ретінде 2 миллион 849 мың 836 доллар жинады. Барлық қаражат AFAD ресми шотына аударылды.
Qazaq.today
