Қазақстандықтар паспортты онлайн ала алмайды: Үкімет себебін түсіндірді

Фото: видеодан скрин

Қазақстанда паспортты онлайн форматта рәсімдеу әзірге жоспарланып отырған жоқ. Бұл туралы Үкімет отырысында ҚР жасанды интеллект және цифрлық даму бірінші вице-министрі Ростислав Коняшкин айтты, деп хабарлайды Qazaqtoday.info ақпарат порталы.

Оның сөзінше, қазір мерзімі аяқталған жеке куәлікті онлайн қайта рәсімдеу қызметі пилоттық режимде сынақтан өтіп жатыр. Алдымен осы қызметті толық жетілдіру көзделген, содан кейін ғана паспорт пен жеке куәлікке қатысты өзге жағдайларды онлайн форматқа көшіру мәселесі қарастырылады.

Алдағы уақытта құжат жоғалғанда немесе азаматтың тегі өзгергенде жеке куәлікті онлайн рәсімдеу мүмкіндігі де қарастырылуы мүмкін.

Коняшкиннің айтуынша, ХҚКО-ларға түсетін өтініштердің шамамен 79 пайызын құрайтын ең сұранысқа ие 10 қызметті онлайн форматқа көшіру жұмысы іс жүзінде аяқталған. Қазір шетелдіктерге ЖСН беру қызметін де онлайн форматқа ауыстыру мәселесі қарастырылып жатыр.

Бұдан бөлек, тағы 12 қызмет толықтай цифрлық форматқа көшірілмек. Мұндай қызметтерді ХҚКО операторлары көрсетпейді, азаматтар оларды өзіне-өзі қызмет көрсету секторында мамандардың кеңесімен ала алады.

Бірінші вице-министрдің мәліметінше, қабылданған шаралардың нәтижесінде ХҚКО операторларына жүгінетін азаматтар саны шамамен 30 пайызға азайған.