Әділет Жауғашар «Сүй, иә» әнінің даулы мәтінін өзгертті

Сурет: Ашық дереккөз

Әлеуметтік желіде қызу талқыға түскен «Сүй, иә» әнінің мәтіні жаңартылды, деп хабарлайды Qazaqtoday.info сайты.

Әнші Әділет Жауғашар көпшілік тарапынан айтылған сыннан кейін туындыдағы даулы жолдарды алып тастады. Бұған дейін әннің «Сұлудың жоқ дегені – иә» деген жолы желі қолданушыларының наразылығын тудырған еді. Жұртшылық бұл сөз адамның «жоқ» деген жауабын елемеуді ақтайтындай әсер қалдыратынын айтып, ән мәтінін сынға алған.

Кейін әннің жаңа нұсқасы ұсынылды. Онда даулы шумақтың орнына: «Сұлудың жоқ дегенін сыйла, Сезімді ала алмайсың қинап. Қыздарды жамандыққа қима, Қима» деген жолдар жазылған.

Ән мәтінінің өзгеруі әлеуметтік желіде де қолдау тапты. Көпшілік өнер иесінің сын-пікірді ескеріп, туындысын қайта қарағанын оң бағалады.