БАӘ-де екі қазақстандық қыз қаза тапты
БАӘ-нің Шарджа қаласында екі қазақстандық қыз қаза тапты. ҚР СІМ көңіл айтып, жағдайды тергеу жүріп жатыр.
Сурет: madeniportal.kz
Біріккен Араб Әмірліктерінің Шарджа қаласында екі қазақстандық қыздың қаза болғаны белгілі болды, деп хабарлайды Qazaqtoday.info сайты.
Қазақстан Республикасының Сыртқы істер министрлігінің хабарлауынша, қазіргі уақытта оқиғаның мән-жайын БАӘ-нің жергілікті құқық қорғау органдары анықтап жатыр. Тергеу амалдарына байланысты қайғылы жағдайдың нақты себептері әзірге жарияланған жоқ.
«Қазақстан Республикасының Сыртқы істер министрлігі Шарджа қаласында қаза тапқан азаматтарымыз А.Б. және Ж.Б.-ның туған-туыстары мен жақындарына көңіл айтады. СІМ марқұмдардың отбасыларымен байланыста және өз құзыреті шегінде қажетті көмек көрсетіп жатыр», – делінген министрлік хабарламасында.
Туыстарының айтуынша, 2006 және 2004 жылы туған екі қыз Шарджада еңбек еткен. Олар тамыз айының соңы – қыркүйек айының басында Қазақстанға оралуды жоспарлаған. Алайда шамамен бір апта бұрын олар жақындарымен байланысын үзген.
Кейін туыстарына қыздардың қаза болғаны туралы хабар жеткен. Жергілікті құқық қорғау органдары оқиғаның мән-жайын анықтап жатыр. Қазақстанның Дубайдағы Бас консулдығы марқұмдардың отбасыларына консулдық-құқықтық көмек көрсетіп, БАӘ құзырлы органдарымен байланыста.
